Ọ̀rọ̀Yorùbá: ÀRÒKỌ

DÁÚDÀ JÁLÉ AGBỌ́N

oroyoruba.blogspot.com.ng
.
Àbúrò Sàká ni Dáúdà jẹ́ ṣùgbọ́n, Kúnlé ni ó jẹ àgbà wọn. Bí Dáúdà ṣe jẹ́ ọmọdé tó yìí, ata ni, kò ṣeé fi sí ojú. Gbogbo eré géle tí àwọn ẹ̀gbọ́n rẹ̀ kò lè ṣe ni ó máa ń ṣe. Dáúdà ní ìkà nínú púpọ̀. Bí àwọn ẹ̀gbọ́n rẹ̀ ṣe ń kìlọ̀ fún un tó, ṣe ni ó máa ń wa ọrùn kì, tí ó ń kọ etí ikún sí ohun tí wọ́n ń sọ fún un.
.
Dáúdà ní rọ́bà tí ó máa ń fi pa ẹmọ́ kiri ní ẹ̀yìnkùlé. Bí kò bárí ẹmọ́, ó máa ń ta rọ́bà rẹ̀ lu aláǹgbá bí ó tilẹ̀ jẹ́ pé kò sí ẹbọ tó fẹ́ fi í rú.
.
Ó jẹ́ àṣà àwọn ọmọdé wọ̀nyí- Dáúdà, Sàká àti Kúnlé, láti máa lọ ran bàbá wọn lọ́wọ́ nínú oko lẹ́hìn tí wọ́n bá ti ilé ẹ̀kọ́ dé. Dáúdà á tilẹ̀ máa fi rọ́bà rẹ̀ tú ìtẹ́ ẹyẹ tí yóò sì pa ẹyẹkẹ́yẹ tí ó bá rí níbẹ̀. Àwọn ẹ̀gbọ́n rẹ̀ kò fẹ́ràn ohun tí ó ń ṣe yìí, wọ́n sì máa ń fi ẹjọ́ rẹ̀ sun bàbá wọn. Bàbá wọn náà kò ṣàì máa bá a wí. Ṣùgbọ́n ẹ̀yìn ni wọ́n ń yín àgbàdo sí lọ́dọ̀ Dáúdà.
.
Ní ọjọ́ tí Dáúdà ta rọ́bà fọ́ agbè ẹmu bàbá Sídí ní ọ̀nà oko wọn, bàbá rẹ̀ nà án funfun gbẹ́ru gbẹ́ru. Wọ́n gba rọ́bà rẹ̀, wọ́n fi ọ̀bẹ rẹ́ ẹ wẹ́lẹ́wẹ́lẹ́. Ṣùgbọ́n lẹ́yìn ọjọ́ mẹ́fà, Dáúdà tún bọ́ sọ́jà láti ra rọ́bà mìíràn.
.
Àwọn òbí rẹ̀ kò mọ̀ pé ó ti ra rọ́bà tuntun, àmọ́ àwọn ẹ̀gbọ́n rẹ̀mọ̀. Ọ̀rọ̀ rẹ̀ sì ti sú wọn. Ìyẹn ni kò jẹ́ kí wọ́n sọ fún bàbá wọn mọ́.
.
Lọ́jọ́ tí ọwọ́ pálábá Dáúdà ségi, ẹnu rẹ̀ kọ ìroyìn. Ní ọ̀sán ọjọ́ yìí, wọ́n ń lọ sí oko, Dáúdà ta ojú kán, ó rí nǹkan náà, ó ń mì dìlọ̀d̀lọ̀, àdán ni ó pè é, ó sún mọ́ ọn dáadáa. Bí ó ṣe ta rọ́bà rẹ̀ pàrà, ilé agbọ́n ló lọ bà. Ilé agbọ́n já lé e lórí; agbọ́n ta á lójú àti nímú. Kò sí ibìkan tí wọ́n dásí ní gbogbo orí rẹ̀. Nígbà tí ó di ọjọ́ kejì, gbogbo iwájú orí rẹ̀ ti wú kọ́ńdú kọ́ńdú, orí rẹ̀ tóbi tó odì ẹyìn, ọmọ ojú rẹ̀ wọnú. Kòsí ẹni tí yóò rí Dáúdà ní àsìkò yìí tí ìrísí rẹ̀ kò ní pa á lẹ́rìn- ín. Yẹ̀yẹ́ ni àwọn ẹ̀gbọ́n rẹ̀ fi i ṣe. Kò kúkú lè lọ sí ilé- ẹ̀kó, ńṣe ni àwọn ẹgbẹ rẹ̀ tí wọ́n gbọ́, wá ń kí I nílé. Kòjọ àwàdà, kò jọ yẹ̀yẹ́ ni wọ́n ń fi í ṣe.
.
Yẹ̀yẹ́ tí wọ́n ń fi Dáúdà ṣe yìí dùn ún púpọ̀. Ó jẹ ìrora oró agbọ́n náà fún ọjọ́ mẹ́ta kí ara rẹ̀ tó bẹ̀rẹ̀sí wálẹ̀. Ọgbọ́n tí bàbá kọ́ Dáúdà tí kò gbọ́n ni agbọ́n wá kọ́ ọ yìí. Ojú rẹ̀ sì já a pé àìgbọràn kì í bímọ rere.
.
- Yorùbá Òde Òní

16.10.16

ÀRÒKỌ

No comments:

Post a Comment