Ọ̀rọ̀Yorùbá: EWÌ

AYÉ

- Ayọ̀ọlá ọmọ Fádèyí

Ayé ta’mọ tiye, yéèyéè
Ẹnu aráye l’ẹbọ
Ayé l’ópe adé ò gún
Ayé l’ópe adé gún
Ayé ṣoró ṣe èèyàn
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Ẹnu aráyé, òrófó
Imú aráyé, ajá
Ikùn ayé, aláǹtakù
Ìrù ayé, ọ̀bọ
Èékánná ayé, ológbò
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Èèyàn bí àparò l’ayé ń fẹ́
Ayé ò fẹ́ kí á ní
Ayé ò fẹ́ kí á yó
Ayé ò fẹ́ kí a tálákà
Ayé ò tún fẹ́ kí a d’ọlọ́rọ̀
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Ẹnu ayé fi bú òriṣà
L’ayé fi ń yin òriṣà
Bí ó ṣe fẹ́rẹ́ fún òriṣà
Ayé á fi ẹnu rẹ̀ tẹ́ńbẹ́lú òriṣà
Òriṣà ni ò gbọdọ̀ bínú da igbá nù
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Ayé á tijú olóṣì fún- un l’ẹ́kọ mu
Ayé á bínú olówó gbèrò sọ́ ọ di tálákà
Ayé ò fẹ́ á gbé ayé
Ayé ò fẹ́ á kú fi ilé ayé sílẹ̀
Bákan méjì l’ayé
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Méjì lẹnu ayé
Ayé ẹlẹ́nu idà
Idà olójú méjì
Tibi tire la d’áyé
L’ọmọ titun fí ń gbé ilé ọmọ rẹ̀ wáyé
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Bí o wíire, ayé á ní o kò wíire
Bí o wí i ní burúkú, ayé á ní o kò wí i ní burúkú
Ayé á dẹ, dẹ̀dẹ́ ìti
Ayé á lu, lùlú ìho
Bí ayé bá dẹ, lúlu l’ayé ń lu
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Bí ayé bá fẹ́ fún ni l’óúnjẹ
Ayé á fi pàṣán ṣe óúnjẹ
Láti fi dá ṣèríà fún elébi
Má ṣe tọrọ lọ́wọ́ayé
Ayé ò fún ni rí, kí á má fi òmíràn san
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Ayé á pé o máa lọ
Ayé á pé òun ń bẹ lẹ́yìn rẹ
Bí o kò w’ẹ̀yìn wò
Ayé ti já ẹ kulẹ̀ sẹ́yìn sẹ́yìn
Tìfura tìfura lafi ń bá ayé rìn
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Ayé ń bẹ
Èèyàn wà
Ta ni ayé, ta l’èèyan?
Ayé l’èèyàn
Èèyàn l’ayé
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

.
Ayé ò ṣé gbẹ́kẹ̀lé
Èèyàn ò ṣé faratì
Má ṣe gbára lé ayé
Òfúrúfú l’ayé
Òfúùrù l’ayé
Òfùùrù jágodo l’ayé
Ayé ọmọ Ayé
Èèyàn ọmọ èèyàn
Èèyàn abìdí yàn- án yà- án

-----------------------------------------------
©2016
oroyoruba.blogspot.com.ng

20.10.16

EWÌ

No comments:

Post a Comment