Ọ̀rọ̀Yorùbá: ÀRÒKỌ

Ọ̀FỌ̀ ṢẸ̀ WÁ NÍNÚ ẸBÍ WA

APÁ KẸRIN

.
Nǹkan púpọ̀ ni mó fẹ́ bèèrè lọ́jọ́ náà lọ́hǔn, ṣùgbọ́n n kò rí ẹni bi. Gbogbo èèyàn ló bara jẹ́ tí wọ́n ṣe bí ẹni pé wọn kò tilẹ̀ rí àwa ọmọdé- ilé. Títí kan àwọn tí wọ́n máa ń yọ̀ kí wa, lásán ni wọ́n kí wa. Obìnrin kan tilẹ̀ sọkún tó bẹ́ẹ̀ gẹ́ẹ́, tí kò tilẹ̀ mọ̀ pé èmi ni mo jókǒ ní kọ̀rọ̀ kan ní ẹ̀yìnkùlé.
.
Wọ́n ti gbé ìbùsùn bàbá mi sí pálọ̀. Mo rí gbogbo àwọn nǹkan tí wọ́n ti rà láti fi sin òkú náà kí wọ́n tó sin ín. Ńṣe ni mo fi gbogbo rẹ̀ ṣe ìran wò. Wọ́n ní kí gbogbo ènìyàn yẹra o, wọ́n ń gbé òkú bọ̀. Mo gbọ́, mo sì fẹ́ wò ó, ṣùgbọ́n ìyá wa àgbà kan lé mi sẹ́hìn. Ó ní, ‘Àwọn ọmọ ayé ìdayìí mà láyà o. Wọ́n ní wọ́n ń gbé òkú bọ̀, ìwọ Ìyábọ̀ ń yọjú. O fẹ́ wo òkú ni?’ Bẹ́ẹ̀ ni kò jẹ́ kí n rí òkú náà wò bí wọ́n ṣe ń gbé e bọ̀. Yàrá bàbá mi ni wọ́n gbé e lọ. Mo sì mọ̀ pé wíwẹ̀ ni wọ́n lọ wẹ̀ ẹ́ nítorí mo ri àwọn ènìyàn wa tí wọ́n ń gbé kàn-ìn-kàn-ìn, igbá omi, aṣọ ìnura, wọ ilé. Ó pẹ́ kí wọ́n tó jáde, wọ́n ní wọ́n ti wẹ òkú tán, wọ́n sì ti wọ ‘ṣọ fún un tán. Wọ́n ní wọ́n ma gbé e lọ sí pálọ̀. Wọ́n wá tẹ́ ẹ sí orí ìbùsùn bàbá mi tí wọ́n ti tẹ́ aṣọ funfun lé.
.
Ó tó agogo méjìlá ọ̀sán báyìí. Tí kò bá sí ọ̀fọ̀ tí ó ṣẹ̀ wá ni, irú àsìkò báyìí , ilé- ìwé ni èmi, ẹ̀gbọ́n àtí àbúrò mi ìbá wà ṣùgbọ́n wọn kò jẹ́ kí á lọ sí ilé- ìwé. Nǹkan púpọ̀ ni ó jẹ́ nǹkan ìyàlẹnu fún mi l’ọ́jọ́ ìsìnkú yìí. Wọ́n ní kí emi àti ẹ̀gbọ́n mi wọ aṣọ funfun kan tí a máa ń wọ̀ lọ sí ilé- ìsìn. Ìyá mi sì fún wa ní gèlè dúdú láti wé. N ò wé gèlè dúdú rí ṣùgbọ́n a ṣe bí wọn ṣe wí. A jókǒ sí ẹ̀hìnkùlé, a n gbọ́ ìkini òkú àti ìdánilóhùn oríṣiríṣi. Ẹlòmíràn á sọkún kíkorò, á sì kí àwọn ènìyàn wa báyìí pé:
Ẹ pẹ̀lẹ́ o.
Ẹ kú àjálù.
Ẹ kú ọ̀fọ̀.
Ọlọ́run yóò ṣe é mọ bẹ́ẹ̀.
Ọlọ́run kò ní í jẹ́ k’a r’írú rẹ̀ mọ́.
.

Ẹlòmíràn á tún dé, a ní ṣe irú rẹ̀ ní tiyín mọ́.
Ọlọ́run yóò fi mọ bẹ́ẹ̀.
Ọlọ́run á tìkùn ìbànújẹ́.
.
Síbẹ̀ ẹlòmíràn tún lè kí wa pé:
Ẹ pẹ̀lẹ́ o.
Ẹ kú ẹjọ́ tí Ọlọ́run dá yín.
Ọlọ́run kò ní í fi irú bẹ́ẹ̀ sí sàkání yín mọ́.
Ọlọ́run kò ní í jẹ́ kí ẹ kú àkúrun mọ́ o.
.

Ìdáhùn àwọn òbí wa sí kíkí ọ̀kan-ò- jọ̀kan wọ̀nyí ni:
Ẹ ṣeun, ṣeun.
Ẹ ṣeun, a dúpẹ́ o.
Ọlọ́run kò ní í ṣe é ní àáró o.
Ọlọ́run kò ní í jẹ́ kí ẹ fi irú rẹ̀ gbà á o.
Bí a ti rí náà nìyẹn o.

.
- ÌYÁBỌ̀

6.11.16

ÀRÒKỌ

1 comment: