Ọ̀rọ̀Yorùbá: EWÌ

ÀGBÀ BÍ ỌMỌDÉ
- Ayọ̀ọlá ọmọ Fádèyí

Àgbà bí ọmọdé
Bí ẹ rí ẹni tó fi ọ̀pá tẹlẹ̀
Tó sọ̀rọ̀ òmùgọ̀
Ọmọdé ni
Àgbà kìí sọ̀rọ̀ òmùgọ̀
Bí ẹwá rí abirun funfun lórí
T’ó ń fi ewú orí ṣe bí ajunilọ
T’ó ń fi ẹsẹ janlẹ̀ kiri l’àdúgbò
Òmọdé ni
Pẹ̀lẹ́ sùúrù l’àgbà fì ń lò
.

Omọdé bí àgbà
Bí ẹrí ènìyaǹ tó sọ̀rọ̀ àtàtà lẹ́nu
Ọ̀rọ̀ ọlọ́gbọ́n, oní làákàyè
Bóṣe ọmọdé lójú yín
Àgbà ni
Bí ẹ rí abirun dúdú lórí
Tó sọ̀rọ̀ àtàtà
Àgbà ni
.

Òótọ́ ni
Ohun àgbà rí ní ìkàlẹ̀
B’ọ́mọdé ga ọrùn oní- pẹ̀tẹ́ẹ̀sì
Kò tó bẹ́ẹ̀, kí ó ri i
Àgbà ọjọ́ orí wà
Àgbà oní làákàyè ń bẹ
.

Ṣ’ẹ ri àwọn àgbà ọlọ́jọ́ orí
Àwọn ni wọ́n ń mu ẹmu tàkìtì kiri ìlú
Àwọn ni kò lè to ilé wọn gún régé
Àgbèrè ò fi wọ́n sílẹ̀ nígbà kan
Gbogbo iṣẹ́ ibi, ọwọ́ wọn ló kun mọ
Bí a bá dà’gbà, à á yé ogun jà
Kọ́ ni ti wọn
Wọ́n á so àgbàdo mọ́ ìdí, adìẹ á sì máa lé wọn kiri
.

‘Wán tú tírí kọ́ lafi ń mọ àgbà
Ó lè ṣe pàtàkì níhà ibìkan
Kìí ṣe gbogbo ibi
Bí ọmọdé ọlọ́jọ́ orí bá fẹ́ dàgbà onílàákàyè
Ó tọ́, kí ó bọ̀wọ̀ fún àgbà ọlọ́jọ́ orí
Ó tọ́, kí ó bọ̀wọ̀ fún àgbà onílàákàyè
.

Wọ́n á pé àádọ́rin ọdún
Wọ́n á tún máa lé ọmọọmọ wọn kiri ní àdúgbò
Fún fífẹ́ kọ, àgbèrè pọ́nbélé ni
Wọ́n á ní ọmo àti aya nílé
Ìyà á jẹ ìyàwó àti ọmọ
Owó kọ́ ló tán nílé
Tàbí iṣẹ́ ló ṣàfẹ́kù
Ọtí àti burańdí ló ń dárà
Ọtí ti pọ̀jù ọ̀kà wọn lọ
Ohun ni aṣọ fi ń pọ́n mọ́ wọn lára
.

Ẹ̀yin àgbà, ẹ ṣe bí àgbà
Ẹ hùwà àgbà
Kí ẹ lè ba kó àwọn ọmọ yín jẹ̀ pẹ́pẹ́pẹ́
Ẹnu àgbà ni obì ń gbó sí
Kí àwọn ọmọdé, má ba tètè mọ iyì yín
.

Tani kò fẹ́ d’àgbà tòótó?
Tani kò fẹ́ d’àgbà oní làákàyè?
Àgbà tí ó mọ ojúṣẹ
Kí n má dàgbà ìranù, àgbà ìyà
Kí n má dàgbà òṣì, àgbà bí ọmọdé
Mo ṣe ìbà àgbà
Mo júbà àgbà
.
-------------------------------------------------

4.10.16

EWÌ

No comments:

Post a Comment