Ọ̀rọ̀Yorùbá: ÀRÒKỌ

ÌGBẸ̀YÌN OLÈ

oroyoruba.blogspot.com.ng

.
Bádérù jẹ́ ògbójú ọlọ́ṣà. Ó máa ń jí ọkọ̀ gbẹ, ó sì máa ń fọ́ báńkì pẹ̀lú. Ó ti sọ òlè jíjà di iṣẹ́ àṣejẹ. Kò sí ẹni tó mọ bàbá rẹ̀. Bẹ́ẹ̀ ni wọn kò mọ ìyá rẹ̀. ‘Èkó gba olè, ó gba ọ̀lẹ’, bí ọ̀rọ̀ Yorùba. Kòkú sẹ́ni tó lè bèère ibi tí ẹnikẹ́ni ti ṣàn wá ní ìlú Èkó. Bádérù ti dé Èkó, ilẹ̀ ta sí i. Kò sì sí iṣẹ́kan tí àwọn ará àdúgbò mọ̀ ọ́n mọ́. Olè ló ń jà kiri. Gbogbo àwọn ará àdúgbò ni wọ́n ti fura pe olé ni.
.
Bádérù kò kúkú mọ̀ pé ẹnikẹ́ni ń wo òun. Ẹni tí à ń wò ní áwòsọkun tí ń wo ara rẹ̀ ní àwò- rẹ́riǹ-ín ni Bádérù. Gbogbo àwọn ará àdúgbò ni kìí fẹ́ kí ọmọ àwọn dé sàkání rẹ̀. Won kò fẹ́ kí ó kọ́ àwọn ọmọ wọn ni iṣẹ́ olè jíjà, ọ̀rọ̀ rẹ̀ tilẹ̀ ti sú wọn. Wọ́n ń retí ọjọ́ tí ọlọ́pàá yóò tẹ̀ ẹ́.
.
Ìwà àwọn ará àdúgbò yìí kò dènà kí Bádérù ní àwọn ọ̀rẹ́. Àwọn ọ̀rẹ́ rẹ̀ a sì maá bá a ṣeré. Ṣùgbọ́n àtòun àtàwọn ọ̀rẹ́ rẹ̀ ni àwọn ènìyàn fi ojú sí lára gẹ́gẹ́ bí ọlọ́ṣà.
.
Bí ènìyàn bá pàdé Bádérù ní ibi fàájì, yóò rò pé ọlọ́lá kan ni. Ńṣe ni ó máa ń náwó bí ẹlẹ́dà. Àwọn obìrin àsìkò kì í wọ́n lọ́dọ̀ rẹ̀. Ó lọ́yàyà, ó sì gbajúmọ̀. Bí Bádérù kìí bá ṣe olè, ó yẹ ní ẹni tí à bá máa pè ní “ẹni ayé yẹ”.
.
Ní ọjọ́ kan ni a gbọ́ pé ọwọ́ tẹ ọlọ́ṣà kan tí ó lọ jí ọkọ̀ àlùfáà ìjọ Ọlọ́run kan gbé. Bádérù ni. Àwọn ọlọ́pàá mú un. Wọ́n gbé e lọ ilé- ẹjọ́. Wọ́n fi ẹ̀sùn kàn án pé ó pa aṣọ́gbà tí ń ṣọ́ ilé àlùfáà yìí. Ẹni bá sì pa ènìyàn, pípa ni à á pa á. Adájọ́ dájọ́ ikú fún Bádérù. Báyìị́ ni Bádérù ṣe gbọ́ ọjọ́ ikú rẹ̀.
.
Àwọn ènìyàn pariwo yèèè. Inú wọn dùn nítorí Bádérù ti ṣọṣẹ́ fún ọ̀pọ̀lọpọ̀ ènìyàn láàrin ìlú. Ní ọjọ́ tí wọ́n fi ẹ̀yìn Bádérù ti àgbá, ńṣe ni ìlú ń rọ́ kẹ̀kẹ̀. Gbogbo ayé ló fẹ́ wo ikú ẹ̀sín ti Bádérù máa kú. Èrò pọ̀ tí wọ́n wá wòran rẹ̀. Wọn kò ṣàánú rẹ̀ rárá. Ẹ̀ṣẹ̀ tó ṣẹ̀ ló ń kéèésú rẹ̀. Ikú ni èrè ẹ̀ṣẹ̀. Olè jíjà kò yẹ ọmọlúwàbí
.
-Ẹ̀kọ́ Èdè Yorùbá Òde Òní
.
oroyoruba.blogspot.com.ng

5.10.16

ÀRÒKỌ

No comments:

Post a Comment